தமிழ் முஸ்லிம் அரசியல் மேடை

மே 30, 2007

"கைதியின் கதை" – உளவுத் துறை விசாரனை – தினமலர்

ஜனாப்.அப்துன் நாசர் மதானி

மதானிக்கு ஆதரவாக “கைதியின் கதை’ ஆவணப்படம் “சிடி’யாக வெளியீடு

கோவை: கோவை குண்டுவெடிப்பு வழக்கில் சிறையில் இருக்கும் மதானி, முஸ்லிம் சிறைவாசிகளுக்கு ஆதரவாக, “கைதியின் கதை’ என்ற ஆவணப்படம் வெளியிடப்பட்டுள்ளது. குண்டுவெடிப்பு வழக்கில் தீர்ப்பு நெருங்கும் வேளையில், “சிடி’ வெளியிடப்பட்ட பின்னணி என்ன என்பது குறித்து உளவுப்பிரிவு போலீசார் விசாரிக்கின்றனர்.

கோவையில் நடந்த தொடர் குண்டுவெடிப்பு வழக்கில், கேரள மக்கள் ஜனநாயக கட்சியினர் நிறுவனர் அப்துல்நாசர் மதானி(41) சிறையில் அடைக்கப்பட்டுள்ளார். இவருடன் 167 குற்றவாளிகள் மீதான விசாரணை தனி நீதிமன்றத்தில் முடிந்தது; தீர்ப்புக்காக வழக்கு காத்திருக்கிறது. இந்நிலையில், “கைதியின் கதை’ (மதானி மற்றும் முஸ்லிம் சிறைவாசிகள் குறித்த ஆவணப்படம்) என்ற தலைப்புடன், 45 நிமிட படம் “சிடி’யாக வெளியிடப்பட்டுள்ளது. தமிழ், மலையாளம், ஆங்கில மொழிகளில் தயாரிக்கப்பட்டுள்ள இந்த படத்தை, “மீடியா ஸ்டெப்ஸ்’ என்ற நிறுவனம் வெளியிட்டுள்ளது; “ஆலூர் ஷானவாஸ்’ என்பவர் இதை தயாரித்துள்ளார். இப்படத்தில், மதானியின் பள்ளி பருவம், ஆவேசமான அரசியல் மேடைப்பேச்சு, மத ரீதியான போதனைகள் இடம்பெற்றுள்ளன. “சங்க் பரிவார்’ அமைப்புக்கு எதிராக 1991ல், “இஸ்லாமிக் சேவா சங்’ அமைப்பை துவக்கியது; வெடிகுண்டு தாக்குதலில் மதானியின் கால் ஊனமடைந்தது தொடர்பான, விளக்கங்கள், காட்சிகள் இடம்பெற்றுள்ளன.

பாபர் மசூதி இடிப்புக்கு பின், “இஸ்லாமிக் சேவா சங்’ தடை செய்யப்பட்டு, “கேரள மக்கள் ஜனநாயக கட்சி’ (பிடிபி)யாக உருவானதும் விளக்கப்பட்டுள்ளது. மதானியின் சொந்த ஊரான, சாஸ்தான் கோட்டையில் வசிக்கும் அவரது தந்தை, பள்ளி தலைமையாசிரியர் அப்துல்சமது பேட்டி, கேரளா மக்கள் ஜனநாயக கட்சியின் மாநில செயலர் முகமது ரஜீம் பேட்டியும் இடம்பெற்றுள்ளன. ரஜீம் பேட்டியில்,””கோவை சிறையில் உள்ள மதானியை விடுவிக்க, சென்னை ஐகோர்ட், கேரளா ஐகோர்ட் மற்றும் சுப்ரீம் கோர்ட் வரை சென்றோம்; முடியவில்லை.

அவர் மீதான வழக்கு செலவுக்காக, எர்ணாகுளத்தில் உள்ள அவரது வீடு விற்கப்பட்டுள்ளது,” என, தெரிவித்துள்ளார். சுப்ரீம் கோர்ட் முன்னாள் நீதிபதி கிருஷ்ணய்யர் அளித்துள்ள பேட்டியில்,””விசாரணைக்காக அழைத்து செல்லப்பட்டவரை, விசாரணை கைதியாகவே ஒன்பது ஆண்டுகள் சிறையில் அடைத்திருப்பது மனித உரிமை மீறல்,” என, தெரிவித்துள்ளார். சிலரது விமர்சனங்களும், இப்படத்தில் இடம்பெற்றுள்ளன.

மதானியின் மனைவி சூபியா அளித்துள்ள பேட்டியில், “”ஒன்பது ஆண்டுகளுக்கு முன் விசாரணைக்காக அழைத்துச் செல்லப்பட்ட கணவர், கோவை சிறையில் உள்ளார். அவரை சந்திக்கும் போதெல்லாம், எனக்கு தைரியமூட்டுவார்; அவரது உடல் நிலை மோசமாக உள்ளது. சிறைக்கு சென்றபோது அவரது எடை 116 கிலோ; தற்போது 46 கிலோவாக குறைந்துவிட்டது. முறையான சிகிச்சை இல்லாததே இதற்கு காரணம்,” என, குற்றம் சாட்டியுள்ளார். இறுதியில், சட்டம், ஜனநாயகத்தின் மீது நம்பிக்கை உள்ளவர்கள், மதானியின் சிறைவாசத்தை நிச்சயம் கண்டிப்பார்கள்’ என்ற வர்ணனையுடன் படம் முடிகிறது. தமிழகம் மற்றும் கேரளாவில் வெளியிடப்பட்டுள்ள இந்த படத்தின் “சிடி’, ஒரு பிரிவு மக்களிடையே வினியோகிக்கப்பட்டு வருகிறது; இதன் பின்னணி என்ன, என்பது குறித்து உளவுப்போலீசார் விசாரிக்கின்றனர்.

செய்தி : தினமலர்

1. கைதியின் கதை சிடி வெளியீட்டு விழா செய்திகள்

2. கைதியின் கதை வீடியோ “தமிழ் முஸ்லிம் மீடியா” வில் வெளியிடப்பட்டுள்ளது. தற்போது இணையத்தில் இது உள்ளது பார்க்க அல்லது டவுன்லோட் செய்ய விரும்புபவர்கள் www.tamilmuslimmedia.com என்ற முகவரியில் சென்று பார்க்கலாம்.

Advertisements

ஏப்ரல் 10, 2007

"கைதியின் கதை" – குறும்படம் (VIDEO)

Filed under: ஆளுர் ஷா நவாஸ், கைதியின் கதை, மதனி, மதானி — முஸ்லிம் @ 7:05 முப

“கைதியின் கதை”
மதானி மற்றும் முஸ்லிம் சிறைவாசிகள் பற்றிய ஆவணப்படம்
45 நிமிடங்கள்
இயக்கம் : ஆளுர் ஷா நவாஸ்
தயாரிப்பு : மீடியா ஸ்டெப்ஸ், சென்னை

படத்தை காண்பதற்கு அல்லது டவுன்லோட் செய்வதற்கு
தமிழ் முஸ்லிம் மீடியா

கல்வி, வேலை வாய்ப்பு மற்றும் அரசியல் அதிகாரத்தில் தனி இடஒதுக்கீடு கேட்டு முஸ்லிம் சமூகம் போராடிக் கொண்டிருக்கிறது. மறுபுறம் இருண்ட சிறையறைகளில் முஸ்லிம்களுக்கான இட ஒதுக்கீட்டை இந்திய தேசம் தந்து கொண்டிருக்கிறது.

இந்திய முஸ்லிம்களின் சமூக பொருளாதார கல்வி நிலை குறித்து ஆய்வு செய்துள்ள நீதிபதி ராஜிந்தர் சச்சார் தலைமையிலான குழுவின் அறிக்கைப்படி 10.6 சதவிகித முஸ்லிம் மக்கள் தொகையைக் கொண்ட மஹாராஸ்ட்டிராவில் சிறையில் வாடும் முஸ்லிம்களின் எண்ணிக்கை 40.6 சதவிகிதமாகும். குஜராத்தில் 10 சதவிகிதத்திற்கும் குறைவாகவே முஸ்லிம்கள் உள்ளனர் ஆனால் சிறைக்கைதிகளின் எண்ணிக்கையோ 25 சதவிகிதத்திற்கும் மேல். காஷ்மிருக்கு அடுத்ததாக முஸ்லிம் மக்கள் தொகையை அதிகமாக கொண்ட அஸ்ஸாமிலும் இதே நிலைதான். தமிழகத்தில் சறைச்சாலைகளில் உள்ள கைதிகளில் 9.6 சதவிகிதம் முஸ்லிம்களாக உள்ளனர். அதிர்ச்சிகரமான இந்த ஆய்வு முடிவைப் பார்க்கும் போது முஸ்லிம்களின் மக்கள் தொகையை விட அவர்களுக்கு அதிக பங்கு அளிகக்ப்பட்டுள்ள ஒரே இடம் சிறைச்சாலை மட்டுமே.

கோவை குண்டு வெடிப்பு மற்றும் அதற்கு முந்தைய பல்வேறு வழக்குகள் காரணமாக சிறையில் அடைக்கப்பட்டுள்ள 200 க்கும் அதிகமான முஸ்லிம் சிறைவாசிகளுக்கு இழைக்கப்பட்டு வரும் கொடுமை இந்திய ஜனநாயகத்தின் உயாந்த கோட்பாடுகளை கேள்விக்குறியாக்கி வருகின்றது.

கேரளாவின் மக்கள் ஜனநாயக கட்சி தலைவர் அப்துன் நாஸர் மதானி உட்பட 200 க்கும் மேற்ப்பட்ட முஸ்லிம்கள் வெறும் விசாரனைக் கைதிகளாகவே கடந்த 9 ஆண்டுகளாக சிறையில் அடைக்கப் பட்டுள்ளனர். குற்றவாளிகள் என்று நிரூபிக்கப்படாத, இனி ஒருபூதும் சிறு குற்றம் கூட செய்யத் திராணியற்ற, மனபலமும், உடல் வலிமையும் குன்றிய மதானி உள்ளிட்ட இந்திய குடிமகன்கள் விடை தெரியாமல் சிறையில் வாடி வருகின்றனர். இந்தியா முழுவதும் தேடி அலைந்தாலும் இது போன்ற ஒரு விசித்திர வழக்கை காண இயலாது.

கேரள மக்கள் ஜனநாயக கட்சி தலைவர் மதானி பற்றி தமிழ்ச் சமூகத்தில் ஒரு தவறான புறிதல் படிந்துள்ளது. அதைக் களையும் வகையில் இந்த ஆவணப்படம் சில உண்மைகளை பதிவு செய்துள்ளது. மக்கள் ஜனநாயகக் கட்சி கேரளாவில் மக்கள் செல்வாக்குடன் செயல்படும், தேர்தலில் பங்கேற்கும் கட்சியாகும். அது வன்முறையை நோக்கமாக கொண்ட கட்சியல்ல, மேலும் மதானி இது நாள் வரையில் எந்த வழக்கிலும் தன்டனைக்குள்ளானவர் அல்ல என்பதும் குறிப்பிடத் தக்கது. சமுதாயத் தலைவராகவும் அரசியல் வல்லுநராகவும் மக்கள் வெள்ளத்தில் மிதந்து வந்த மதானி, இன்று வாழ்வுக்கும் மரணத்துக்கும் இடையேயான இறுதிப் போராட்டத்தில் தன்னை இழந்து கொண்டிருக்கிறார்.

அரசியல் பின்புலம் கொண்ட மதானிக்கே இந்த நிலை என்றால், தமிழகத்து கொடுஞ்சிறைகளில் குற்றம் நிரூபிக்கப்படாமல்ட நெடுங்காலமாக வாடிக் கொண்டிருக்கும் அப்பாவி முஸ்லிம்களின் நிலையை என்னவென்பது?

மனித நேயம் மற்றும் சமூக நீதியின் தொட்டிலான தமிழகத்தில் இத்தகைய கொடுமைகள் அரங்கேறுவதை ஒருபோதும் ஏற்றுக் கொள்ள முடியாது. மனித உரிமைத் தத்துவத்தை தீயிலிட்டு பொசுக்குகின்ற இத்தகைய வன் செயல்களு்கு முடிவு வேண்டும்.

கண்ணீரில் கரையும் முஸ்லிம் சிறைவாசிகளின் அவல வாழ்க்கைக்கு விடிவு வேண்டும்.

அத்தகைய விடிவை நோக்கிய களப்போராட்டத்தின் கருத்தியல் கருவியாக இந்த ஆவணப்படம் இணைந்து கொள்கின்றது.

படத்தை காண்பதற்கு அல்லது டவுன்லோட் செய்வதற்கு

தமிழ் முஸ்லிம் மீடியா
காரைக்குடி, இஸ்லாம், முஸ்லிம், மதானி, இந்திய முஸ்லிம்கள்

Create a free website or blog at WordPress.com.